Hierdie lepeltjie-vetkoek eet ons saam met ons gunstelingherfssop.
My dogter, Errida Junior, het hierdie vetkoek tydens ons eerste saamkook in isolasie gemaak terwyl ék die drukpot nader getrek het vir ons gunstelingherfssop, ‘stadige’ rooilensiesop met murgbene…
Ek onthou my kind se trots oor haar handewerk: “Op hindsight, volgende keer maak ek die vetkoek dubbeld aan, want mens wil huil as dit op is.”
Vinnige Lepeltjie-Vetkoek
Errieda du Toit
Maak 6-8 vetkoekies
Bestandele
1 koppie (250 ml) koekmeel
1 tlp (5 ml) bakpoeier
½ tlp (2,5) ml sout
1 eier, geklits
½ koppie (125 ml) melk (of dalk bietjie meer)
Olie vir vlakbraai
Metode
Sif die meel, bakpoeier en sout saam in ’n mengbak. Roer die geklitste eier by die droë bestanddele tot ’n gladde tekstuur verkry is. Voeg die melk by om ’n slap deeg te vorm (verdun met nog ’n bietjie melk of water indien nodig).
Giet genoeg olie in ’n pan om die bodem behoorlik te bedek en verhit oor matige hitte. Skep lepels vol van die beslag in die warm olie (sowat 4 op ’n slag) en braai aan albei kante tot goudbruin en gaar. Die olie moenie te warm wees nie, anders raak die vetkoeke te bruin voor dit behoorlik gaar is.
Dreineer op bruinpapier of kombuispapier en eet terwyl warm. Dis heerlik met sop, of met kaas en gouestroop.
